phir khinch gai achanak hamdam kaman-e-taqdir

phir khiñch ga.ī achānak hamdam kamān-e-taqdīr

aa.e dil-e-hazīñ par jaur-o-sitam ke phir tiir

ġhairoñ se jab mile ham apnā banā ke chhoḌā

aur kar sake na us ko karnā thā jis ko tasḳhīr

auroñ ke chāk-qismat ham ne rafū kiye the

aur sī sake na apnā afsos chāk-e-taqdīr

is darja sū-e-zan hai har baat dil shikan hai

laa.e kahāñ se har din ik dil nayā ba-dil-gīr

pās-e-vafā hamārā mohar-e-dahan banā hai

kis tarah ho sakegī ahvāl-e-dil kī tafsīr

āzād kab thī bulbul jo daam meñ phañsī ab

sayyād ḳhud rag-e-gul thī us ke haq meñ zanjīr

kyoñ surḳh ho rahī haiñ phir tīliyāñ qafas kī

ai ashk-e-ḳhūñ nayā gul shāyad khilā.e taqdīr

aayā jo dar pe mujrim rahmat ne us ko baḳhshā

kyā qābil-e-muāfī apnī nahīñ thī taqsīr

phir khinch gai achanak hamdam kaman-e-taqdir

aae dil-e-hazin par jaur-o-sitam ke phir tir

ghairon se jab mile hum apna bana ke chhoDa

aur kar sake na us ko karna tha jis ko tasKHir

auron ke chaak-qismat hum ne rafu kiye the

aur si sake na apna afsos chaak-e-taqdir

is darja su-e-zan hai har baat dil shikan hai

lae kahan se har din ek dil naya ba-dil-gir

pas-e-wafa hamara mohar-e-dahan bana hai

kis tarah ho sakegi ahwal-e-dil ki tafsir

aazad kab thi bulbul jo dam mein phansi ab

sayyaad KHud rag-e-gul thi us ke haq mein zanjir

kyon surKH ho rahi hain phir tiliyan qafas ki

ai ashk-e-KHun naya gul shayad khilae taqdir

aaya jo dar pe mujrim rahmat ne us ko baKHsha

kya qabil-e-muafi apni nahin thi taqsir