phir kisi qarya-e-hijrat se mujhe dekhta hai

phir kisī qarya-e-hijrat se mujhe dekhtā hai

ishq ab kaun sī ġhāyat se mujhe dekhtā hai

koī paiġhām musalsal hai mirī ḳhaak ke naam

ik sitāra baḌī muddat se mujhe dekhtā hai

kis ko samjhā.ūñ shab-e-tār meñ dil kī mushkil

chāñd bhī apnī suhūlat se mujhe dekhtā hai

ain mumkin hai samundar ko bulā luuñ maiñ bhī

shahr kā shahr ra.ūnat se mujhe dekhtā hai

aisī vahshat hai in āñkhoñ meñ ki ab sahrā kā

jo bhī zarra hai aqīdat se mujhe dekhtā hai

kaisā ā.īna huuñ hairān nahīñ huuñ 'tāriq'

dekhne vaalā bhī hairat se mujhe dekhtā hai

phir kisi qarya-e-hijrat se mujhe dekhta hai

ishq ab kaun si ghayat se mujhe dekhta hai

koi paigham musalsal hai meri KHak ke nam

ek sitara baDi muddat se mujhe dekhta hai

kis ko samjhaun shab-e-tar mein dil ki mushkil

chand bhi apni suhulat se mujhe dekhta hai

ain mumkin hai samundar ko bula lun main bhi

shahr ka shahr raunat se mujhe dekhta hai

aisi wahshat hai in aankhon mein ki ab sahra ka

jo bhi zarra hai aqidat se mujhe dekhta hai

kaisa aaina hun hairan nahin hun 'tariq'

dekhne wala bhi hairat se mujhe dekhta hai