phir koi taza-sitam wo sitam-ijad kare

phir koī tāza-sitam vo sitam-ījād kare

kaash is karb-e-taġhāful se ab āzād kare

kahīñ banjar hī na ho jaa.e mire dil kī zamīñ

lāla-e-zaḳhm se is kisht ko ābād kare

jāntā thā ke har āvāz palaT aa.egī

phir tavātur se duā kyuuñ dil-e-nāshād kare

apne lahje kī hī saḳhtī ko tasavvur kar ke

lauT aane kī shab-e-hijr meñ fariyād kare

gām-dar-gām badaltā hai chalan zālim kā

jaane is baar na.ī kaun sī bedād kare

us se kah de koī ḳhāmosh hai sāz-e-hastī

chheḌ kar vasl kā naġhma mirā dil shaad kare

log anjām kī dahshat se nikal aa.e haiñ

ab jo kar paa.e to is shahr ko barbād kare

phir koi taza-sitam wo sitam-ijad kare

kash is karb-e-taghaful se ab aazad kare

kahin banjar hi na ho jae mere dil ki zamin

lala-e-zaKHm se is kisht ko aabaad kare

jaanta tha ke har aawaz palaT aaegi

phir tawatur se dua kyun dil-e-nashad kare

apne lahje ki hi saKHti ko tasawwur kar ke

lauT aane ki shab-e-hijr mein fariyaad kare

gam-dar-gam badalta hai chalan zalim ka

jaane is bar nai kaun si bedad kare

us se kah de koi KHamosh hai saz-e-hasti

chheD kar wasl ka naghma mera dil shad kare

log anjam ki dahshat se nikal aae hain

ab jo kar pae to is shahr ko barbaad kare