phir mayassar ye mulaqat kabhi ho ki na ho

phir mayassar ye mulāqāt kabhī ho ki na ho

sāmne baiTh ke phir baat kabhī ho ki na ho

aao ham bojh diloñ kā zarā halkā kar leñ

kyā ḳhabar ashkoñ kī barsāt kabhī ho ki na ho

ye bhī mumkin hai ki maiñ aap kā dil rakh pā.ūñ

phir se ye ālam-e-jazbāt kabhī ho ki na ho

chhoḌne vaalā thā dil tere karam kī ummīd

Dar thā phir lutf-e-ishārāt kabhī ho ki na ho

thā irāda ki koī baat adhūrī na rahe

kyā ḳhabar fursat-e-lamhāt kabhī ho ki na ho

pyaar ke naam pe ye zaḳhm bhī haiñ mujh ko qubūl

phir mirī nazr ye sauġhāt kabhī ho ki na ho

tujh se milne kā ye mauqa hameñ qismat se milā

aisī dilchasp mulāqāt kabhī ho ki na ho

yahī behtar hai ki ham kar leñ qubūl apne gunāh

ḳhud se is tarah mulāqāt kabhī ho ki na ho

itnā bebas thā maiñ 'anjum' ki zabāñ khul na sakī

kyā ḳhabar ḳhatm siyah raat kabhī ho ki na ho

phir mayassar ye mulaqat kabhi ho ki na ho

samne baiTh ke phir baat kabhi ho ki na ho

aao hum bojh dilon ka zara halka kar len

kya KHabar ashkon ki barsat kabhi ho ki na ho

ye bhi mumkin hai ki main aap ka dil rakh paun

phir se ye aalam-e-jazbaat kabhi ho ki na ho

chhoDne wala tha dil tere karam ki ummid

Dar tha phir lutf-e-ishaaraat kabhi ho ki na ho

tha irada ki koi baat adhuri na rahe

kya KHabar fursat-e-lamhat kabhi ho ki na ho

pyar ke nam pe ye zaKHm bhi hain mujh ko qubul

phir meri nazr ye saughat kabhi ho ki na ho

tujh se milne ka ye mauqa hamein qismat se mila

aisi dilchasp mulaqat kabhi ho ki na ho

yahi behtar hai ki hum kar len qubul apne gunah

KHud se is tarah mulaqat kabhi ho ki na ho

itna bebas tha main 'anjum' ki zaban khul na saki

kya KHabar KHatm siyah raat kabhi ho ki na ho