phir mere dil ka sukun aapne barbaad kiya

phir mire dil kā sukūñ aap ne barbād kiyā

aap se kis ne kahā thā jo mujhe yaad kiyā

pā-ba-zanjīr jo tū ne mujhe sayyād kiyā

mujh ko har ranj se har fikr se āzād kiyā

jaan bhī jaa.e to maiñ uf na karūñgā hargiz

is bharose ne use mā.il-e-bedād kiyā

chaliye maiñ hī sahī paimāñ-shikanī kā mujrim

bevafā maiñ huuñ bajā aap ne irshād kiyā

ik nigāh-e-ġhalat-andāz se dekhā to mujhe

ek lamhe ko sahī dil to mirā shaad kiyā

bhūlne vaale tujhe merī mohabbat kī qasam

ab jo bhūle se kabhī tū ne mujhe yaad kiyā

kis pe ilzām dhareñ dil kī tabāhī kā 'shamīm'

sach to ye hai ki hamīñ ne use barbād kiyā

phir mere dil ka sukun aap ne barbaad kiya

aap se kis ne kaha tha jo mujhe yaad kiya

pa-ba-zanjir jo tu ne mujhe sayyaad kiya

mujh ko har ranj se har fikr se aazad kiya

jaan bhi jae to main uf na karunga hargiz

is bharose ne use mail-e-bedad kiya

chaliye main hi sahi paiman-shikani ka mujrim

bewafa main hun baja aap ne irshad kiya

ek nigah-e-ghalat-andaz se dekha to mujhe

ek lamhe ko sahi dil to mera shad kiya

bhulne wale tujhe meri mohabbat ki qasam

ab jo bhule se kabhi tu ne mujhe yaad kiya

kis pe ilzam dharen dil ki tabahi ka 'shamim'

sach to ye hai ki hamin ne use barbaad kiya