phir mujhe har sitam gawara hai

phir mujhe har sitam gavārā hai

aap kah deñ ki tū hamārā hai

multafit aap bhī hue haiñ aaj

jab mujhe maut ne pukārā hai

maut jab zindagī se behtar thī

ham ne vo vaqt bhī guzārā hai

tum mujhe ġhair kyoñ samajhte ho

ab mirā har-nafas tumhārā hai

muddatoñ ġham ko raaz meñ rakkhā

ab to ye raaz āshkārā hai

Duub jā.eñge Dūbne vaale

ek tinke kā kyā sahārā hai

tum hī yaad aa.e ho musībat meñ

jab pukārā tumheñ pukārā hai

tum agar mai pilāo āñkhoñ se

talḳhī-e-zīst bhī gavārā hai

ai 'shifā' dost se nahīñ shikva

ham ko apnī vafā ne maarā hai

phir mujhe har sitam gawara hai

aap kah den ki tu hamara hai

multafit aap bhi hue hain aaj

jab mujhe maut ne pukara hai

maut jab zindagi se behtar thi

hum ne wo waqt bhi guzara hai

tum mujhe ghair kyon samajhte ho

ab mera har-nafas tumhaara hai

muddaton gham ko raaz mein rakkha

ab to ye raaz aashkara hai

Dub jaenge Dubne wale

ek tinke ka kya sahaara hai

tum hi yaad aae ho musibat mein

jab pukara tumhein pukara hai

tum agar mai pilao aankhon se

talKHi-e-zist bhi gawara hai

ai 'shifa' dost se nahin shikwa

hum ko apni wafa ne mara hai