phir mujhe likhna jo wasf-e-ru-e-jaanan ho gaya

phir mujhe likhnā jo vasf-e-rū-e-jānāñ ho gayā

vājib is jā par qalam ko sar jhukānā ho gayā

sar-kashī itnī nahīñ zālim hai o zulf-e-siyah

bas ki tārīk apnī āñkhoñ meñ zamāna ho gayā

dhyān aayā jis ghaḌī us ke dahān-e-tañg kā

ho gayā dam band mushkil lab hilānā ho gayā

ai azal jaldī rihā.ī de na bas tāḳhīr kar

ḳhāna-e-tan bhī mujhe ab qaid-ḳhāna ho gayā

aaj tak ā.īna-vash hairān hai is fikr meñ

kab yahāñ aayā sikandar kab ravāna ho gayā

daulat-e-duniyā na kaam aa.egī kuchh bhī ba.ad-e-marg

hai zamīñ meñ ḳhaak qārūñ kā ḳhazāna ho gayā

baat karne meñ jo lab us ke hue zer-o-zabar

ek saa.at meñ tah-o-bālā zamāna ho gayā

dekh lī raftār us gul kī chaman meñ kyā sabā

sarv ko mushkil qadam aage baḌhānā ho gayā

jaan dī āḳhir qafas meñ andalīb-e-zār ne

muzhda hai sayyād vīrāñ āshiyāna ho gayā

zinda kar detā hai ik dam meñ ye īsā-e-nafas

khel is ko goyā murde ko jilānā ho gayā

tausan-e-umr-e-ravāñ dam bhar nahīñ ruktā 'rasā'

har nafas goyā usī kā tāziyāna ho gayā

phir mujhe likhna jo wasf-e-ru-e-jaanan ho gaya

wajib is ja par qalam ko sar jhukana ho gaya

sar-kashi itni nahin zalim hai o zulf-e-siyah

bas ki tarik apni aankhon mein zamana ho gaya

dhyan aaya jis ghaDi us ke dahan-e-tang ka

ho gaya dam band mushkil lab hilana ho gaya

ai azal jaldi rihai de na bas taKHir kar

KHana-e-tan bhi mujhe ab qaid-KHana ho gaya

aaj tak aaina-wash hairan hai is fikr mein

kab yahan aaya sikandar kab rawana ho gaya

daulat-e-duniya na kaam aaegi kuchh bhi baad-e-marg

hai zamin mein KHak qarun ka KHazana ho gaya

baat karne mein jo lab us ke hue zer-o-zabar

ek saat mein tah-o-baala zamana ho gaya

dekh li raftar us gul ki chaman mein kya saba

sarw ko mushkil qadam aage baDhana ho gaya

jaan di aaKHir qafas mein andalib-e-zar ne

muzhda hai sayyaad viran aashiyana ho gaya

zinda kar deta hai ek dam mein ye isa-e-nafas

khel is ko goya murde ko jilana ho gaya

tausan-e-umr-e-rawan dam bhar nahin rukta 'rasa'

har nafas goya usi ka taziyana ho gaya