phir mulaqat mein hai ishq ke aaghaz ka rang

phir mulāqāt meñ hai ishq ke āġhāz kā rañg

vahī āvāz kī nik.hat vahī andāz kā rañg

aam alfāz meñ poshīda ma.ānī kī taheñ

har nigāh-e-ġhalat-andāz liye raaz kā rañg

sar-nigūñ haibat-e-jallād-o-shikoh-e-sultāñ

dīdanī daar pe thā ishq-e-sar-e-afrāz kā rañg

aa.e mahfil meñ to larzī haiñ charāġhoñ kī laveñ

un ke dīdār se hai shoḳh gul-e-nāz kā rañg

hāl-e-dil chhup na sakā parda-e-ḳhāmoshī meñ

tarjumāñ dil kā banā āriz-e-ġhammāz kā rañg

phir mulaqat mein hai ishq ke aaghaz ka rang

wahi aawaz ki nikhat wahi andaz ka rang

aam alfaz mein poshida maani ki tahen

har nigah-e-ghalat-andaz liye raaz ka rang

sar-nigun haibat-e-jallad-o-shikoh-e-sultan

didani dar pe tha ishq-e-sar-e-afraaz ka rang

aae mahfil mein to larzi hain charaghon ki lawen

un ke didar se hai shoKH gul-e-naz ka rang

haal-e-dil chhup na saka parda-e-KHamoshi mein

tarjuman dil ka bana aariz-e-ghammaz ka rang