پھر نہ مانگوں گا کبھی جام ٹھہر جا ساقی

پھر نہ مانگوں گا کبھی جام ٹھہر جا ساقی

عمر لکھ دوں گا ترے نام ٹھہر جا ساقی

صرف پینے کے لیے آتا نہیں ہوں در پے

آج کرنا ہے بہت کام ٹھہر جا ساقی

ہم کو ملنے نہیں دیں گے یہ زمانے والے

بے سبب کرتے ہیں بدنام ٹھہر جا ساقی

لوگ سوچیں گے کوئی آیا ہے میخانے میں

یاد رہ جائے گی یہ شام ٹھہر جا ساقی

وقت مشکل سے ملا ہے تو مجھے کرنے دے

دو گھڑی کے لیے آرام ٹھہر جا ساقی

تو نے آغاز کیا ہے تو پلا جی بھر کے

دیکھنے دے مجھے انجام ٹھہر جا ساقی

شوق کے واسطے پینا بھی کوئی پینا ہے

چھوڑ جائیں گے یہ پیغام ٹھہر جا ساقی

خاص لوگوں میں سبھی گنتے ہیں مجھ کو نورنگؔ

ہو نہ جاؤں کہیں میں عام ٹھہر جا ساقی