پھر نگاہوں کو وہی منظر پرانے دے گیا

پھر نگاہوں کو وہی منظر پرانے دے گیا

زندگی کے واسطے کیسے بہانے دے گیا

مجھ کو اپنی پشت پر رکھ کر ہوائیں لے اڑیں

اور میرا شوق مجھ کو تازیانے دے گیا

یہ کرم اس کا جو مجھ کو پتھروں کے شہر میں

جتنے بھی شیشوں کے تھے سب کارخانے دے گیا

میں نے اس سے کچھ نہیں مانگا مگر وہ خود مجھے

جو بھی اس کے پاس تھے سارے خزانے دے گیا

ایک ہی شب وہ یہاں ٹھہرا مگر جاتے ہوئے

کیا چھپا کر لے گیا اور کیا نہ جانے دے گیا

اس پرندے نے تو اک مدت سے کھایا تھا نہ کچھ

اک شکاری آج آ کر اس کو دانے دے گیا