پھر نقوش ماسوا کا دل میں طوفاں دیکھ کر

پھر نقوش ماسوا کا دل میں طوفاں دیکھ کر

ان کو آنا ہی پڑا مجھ کو پریشاں دیکھ کر

دیکھ کر اک بار ان کو بند آنکھیں ہو گئیں

دیکھتا بھی کیا جمال روئے تاباں دیکھ کر

جس طرح دریا میں ہوتا ہے سکوں طوفاں کے بعد

آ گئی ہے نیند اک خواب پریشاں دیکھ کر

جستجو میں جس کی چھائے تھے زمین و آسماں

محو حیرت ہوں اسے نزد رگ جاں دیکھ کر

میں تو آیا تھا یہاں توقیر انساں دیکھنے

ہٹ گیا دنیا سے دل انساں کو ارزاں دیکھ کر

اب تو شاید آ ہی جائے گا مرے دل کو قرار

مطمئن ہوں پھر کسی کو محو درماں دیکھ کر

مانگنے کو میں تو مانگوں گا زمین و آسماں

آپ مجھ کو دیجئے گا میرا داماں دیکھ کر

اب تو تم ترتیب دے سکتے ہو افسانہ مرا

تھک گیا ہوں میں تو اوراق پریشاں دیکھ کر

ہم شفاؔ آراستہ کرتے رہے دیر و حرم

وہ ہوئے مہمان دل میں دل کو ویراں دیکھ کر