phir nuqush-e-ma-siwa ka dil mein tufan dekh kar

phir nuqūsh-e-mā-sivā kā dil meñ tūfāñ dekh kar

un ko aanā hī paḌā mujh ko pareshāñ dekh kar

dekh kar ik baar un ko band āñkheñ ho ga.iiñ

dekhtā bhī kyā jamāl-e-rū-e-tābāñ dekh kar

jis tarah dariyā meñ hotā hai sukūñ tūfāñ ke baa'd

aa ga.ī hai niiñd ik ḳhvāb-e-pareshāñ dekh kar

justujū meñ jis kī chhā.e the zamīn-o-āsmāñ

mahv-e-hairat huuñ use nazd-e-rag-e-jāñ dekh kar

maiñ to aaya thā yahāñ tauqīr-e-insāñ dekhne

haT gayā duniyā se dil insāñ ko arzāñ dekh kar

ab to shāyad aa hī jā.egā mire dil ko qarār

mutma.in huuñ phir kisī ko mahv-e-darmāñ dekh kar

māñgne ko maiñ to māñgūñgā zamīn-o-āsmāñ

aap mujh ko dījiyegā merā dāmāñ dekh kar

ab to tum tartīb de sakte ho afsāna mirā

thak gayā huuñ maiñ to aurāq-e-pareshāñ dekh kar

ham 'shifā' ārāsta karte rahe dair-o-haram

vo hue mehmān dil meñ dil ko vīrāñ dekh kar

phir nuqush-e-ma-siwa ka dil mein tufan dekh kar

un ko aana hi paDa mujh ko pareshan dekh kar

dekh kar ek bar un ko band aankhen ho gain

dekhta bhi kya jamal-e-ru-e-taban dekh kar

jis tarah dariya mein hota hai sukun tufan ke ba'd

aa gai hai nind ek KHwab-e-pareshan dekh kar

justuju mein jis ki chhae the zamin-o-asman

mahw-e-hairat hun use nazd-e-rag-e-jaan dekh kar

main to aaya tha yahan tauqir-e-insan dekhne

haT gaya duniya se dil insan ko arzan dekh kar

ab to shayad aa hi jaega mere dil ko qarar

mutmain hun phir kisi ko mahw-e-darman dekh kar

mangne ko main to mangunga zamin-o-asman

aap mujh ko dijiyega mera daman dekh kar

ab to tum tartib de sakte ho afsana mera

thak gaya hun main to auraq-e-pareshan dekh kar

hum 'shifa' aarasta karte rahe dair-o-haram

wo hue mehman dil mein dil ko viran dekh kar