phir pareshan-haal hai qalb-o-jigar kya kijiye

phir pareshāñ-hāl hai qalb-o-jigar kyā kījiye

ab ilāj-e-gardish-e-shām-o-sahar kyā kījiye

mehrbāñ ho bhī agar ab chārāgar kyā kījiye

kar chukā hai dard hī is dil meñ ghar kyā kījiye

dekhiye kab maut kā jhoñkā bujhā Daale ise

zindagī hai ik charāġh-e-rahguzar kyā kījiye

ham se hotā hī nahīñ dard-e-mohabbat kā ilaaj

ab yahī karte haiñ ham kuchh soch kar kyā kījiye

rāhat-o-ārām kā is meñ nahīñ koī guzar

ho rahī hai zindagī phir bhī basar kyā kījiye

jab hamāre lab pe aatī hai kabhī matlab kī baat

hañs diyā karte haiñ vo muñh pher kar kyā kījiye

sochte haiñ hāl-e-dil ho kis tarah un se bayāñ

vo bigaḌ jaate haiñ har ik baat par kyā kījiye

ham ne jin kī chaah meñ barbād kar dī zindagī

ham pe hotī hī nahīñ un kī nazar kyā kījiye

ham ne 'āsī' un kā har ilzām apne sar liyā

apne dushman the hamīñ kuchh is qadar kyā kījiye

phir pareshan-haal hai qalb-o-jigar kya kijiye

ab ilaj-e-gardish-e-sham-o-sahar kya kijiye

mehrban ho bhi agar ab chaaragar kya kijiye

kar chuka hai dard hi is dil mein ghar kya kijiye

dekhiye kab maut ka jhonka bujha Dale ise

zindagi hai ek charagh-e-rahguzar kya kijiye

hum se hota hi nahin dard-e-mohabbat ka ilaj

ab yahi karte hain hum kuchh soch kar kya kijiye

rahat-o-aram ka is mein nahin koi guzar

ho rahi hai zindagi phir bhi basar kya kijiye

jab hamare lab pe aati hai kabhi matlab ki baat

hans diya karte hain wo munh pher kar kya kijiye

sochte hain haal-e-dil ho kis tarah un se bayan

wo bigaD jate hain har ek baat par kya kijiye

hum ne jin ki chah mein barbaad kar di zindagi

hum pe hoti hi nahin un ki nazar kya kijiye

hum ne 'asi' un ka har ilzam apne sar liya

apne dushman the hamin kuchh is qadar kya kijiye