phir rag-e-shoala-e-jaan-soz mein nashtar guzra

phir rag-e-sho.ala-e-jāñ-soz meñ nashtar guzrā

naala kyuuñ ābla-e-dil se ulajh kar guzrā

maiñ huuñ dil-dārī-e-afsūn-e-vafā par nāzāñ

jo raqīboñ pe na guzrā thā vo mujh par guzrā

kyā muhīt-e-mai-e-be-rañg meñ tūfāñ aayā

josh-e-rañg anjuman-e-nāz se bāhar guzrā

tishna-e-hasrat-e-jāved huuñ maiñ kyā jānūñ

kyuuñ gale se mire talḳhāba-e-kausar guzrā

aao mere dil-e-afsurda kī tamkīñ dekho

jaao is kashmakash-e-nāz se maiñ dar-guzarā

luT ga.ī jaan to ummīd ke pahlū DhūñDe

miT ga.ī raah to andesha-e-rahbar guzrā

is takalluf se ga.ī umr-e-girāñ-māya 'vafā'

ek dam saiñkaḌoñ barsoñ ke barābar guzrā

phir rag-e-shoala-e-jaan-soz mein nashtar guzra

nala kyun aabla-e-dil se ulajh kar guzra

main hun dil-dari-e-afsun-e-wafa par nazan

jo raqibon pe na guzra tha wo mujh par guzra

kya muhit-e-mai-e-be-rang mein tufan aaya

josh-e-rang anjuman-e-naz se bahar guzra

tishna-e-hasrat-e-jawed hun main kya jaanun

kyun gale se mere talKHaba-e-kausar guzra

aao mere dil-e-afsurda ki tamkin dekho

jao is kashmakash-e-naz se main dar-guzara

luT gai jaan to ummid ke pahlu DhunDe

miT gai rah to andesha-e-rahbar guzra

is takalluf se gai umr-e-giran-maya 'wafa'

ek dam sainkaDon barson ke barabar guzra