phir rah-e-ishq wahi zad-e-safar mange hai

phir rah-e-ishq vahī zād-e-safar māñge hai

vaqt phir qalb-e-tapāñ dīda-e-tar māñge hai

sajde maqbūl nahīñ bārgah-e-nāz meñ ab

āstāñ husn kā sajde nahīñ sar māñge hai

kis ne pahuñchā diyā us hosh-rubā vaadī meñ

ki jahāñ vahshat-e-dil zād-e-safar māñge hai

merī duniyā ke taqāzoñ hī pe mauqūf nahīñ

diin bhī ek nayā fikr-o-nazar māñge hai

ishq ko zāviya-e-dīd badalnā hogā

jalva-e-husn nayā zauq-e-nazar māñge hai

sab kī āñkhoñ se bachā kar jo kabhī luuTe the

vaqt har chor se vo la.al-o-gohar māñge hai

diin o duniyā ho ki ho ishq o havas ai 'saġhar'

har koī ḳhūn-e-jigar ḳhūn-e-jigar māñge hai

phir rah-e-ishq wahi zad-e-safar mange hai

waqt phir qalb-e-tapan dida-e-tar mange hai

sajde maqbul nahin bargah-e-naz mein ab

aastan husn ka sajde nahin sar mange hai

kis ne pahuncha diya us hosh-ruba wadi mein

ki jahan wahshat-e-dil zad-e-safar mange hai

meri duniya ke taqazon hi pe mauquf nahin

din bhi ek naya fikr-o-nazar mange hai

ishq ko zawiya-e-did badalna hoga

jalwa-e-husn naya zauq-e-nazar mange hai

sab ki aankhon se bacha kar jo kabhi luTe the

waqt har chor se wo lal-o-gohar mange hai

din o duniya ho ki ho ishq o hawas ai 'saghar'

har koi KHun-e-jigar KHun-e-jigar mange hai