پھر صبا گزری ہے در‌ صحن چمن کیا کہنا

پھر صبا گزری ہے در‌ صحن چمن کیا کہنا

اب تلک کانپتے ہیں سرو و سمن کیا کہنا

ذرۂ خاک ہوں میں سیل حوادث کے لیے

اور اس ذرے میں دل شاہ زمن کیا کہنا

جسم کے حکم سے آزاد ہو جاں چاہا تھا

روح کے حکم سے آزاد ہے تن کیا کہنا

شہر ویران ہوا گور غریباں کی طرح

اس پہ میں اور مری رنگینئ فن کیا کہنا

ہے گراں طبع شہیداں پہ مزار و مرقد

جسم خوں بستہ ہے خود ان کا کفن کیا کہنا

لیک یہ بھی تو کھلے کچھ تری نیت کیا ہے

ندرت فکر اور انداز سخن کیا کہنا

آخرش سہل ہوا نفع و ضرر کا مطلب

اب ہر اک چیز پہ چسپاں ہے سمن کیا کہنا

زیست اک پل ہے فقط دیکھیے کیا کیجیے کیا

اور اس پل میں بھی صد رنج و محن کیا کہنا

اس قدر خوف میں ہوں میں کہ نہ نیند آوے ہے

کس قدر خواب میں ہیں اہل وطن کیا کہنا