phir saba guzri hai dar-e-sehn-e-chaman kya kahna

phir sabā guzrī hai dar-e-sehn-e-chaman kyā kahnā

ab talak kāñpte haiñ sarv-o-saman kyā kahnā

zarra-e-ḳhāk huuñ maiñ sail-e-havādis ke liye

aur is zarre meñ dil shāh-e-zaman kyā kahnā

jism ke hukm se āzād ho jaañ chāhā thā

ruuh ke hukm se āzād hai tan kyā kahnā

shahr vīrān huā gor-e-ġharībāñ kī tarah

us pe maiñ aur mirī rañgīnī-e-fan kyā kahnā

hai garāñ tab-e-shahīdāñ pe mazār-o-marqad

jism ḳhūñ-basta hai ḳhud un kā kafan kyā kahnā

lek ye bhī to khule kuchh tirī niyyat kyā hai

nudrat-e-fikr aur andāz-e-suḳhan kyā kahnā

āḳhirash sahl huā naf-o-zarar kā matlab

ab har ik chiiz pe chaspāñ hai saman kyā kahnā

ziist ik pal hai faqat dekhiye kyā kījiye kyā

aur is pal meñ bhī sad ranj-o-mehan kyā kahnā

is qadar ḳhauf meñ huuñ maiñ ki na niiñd aave hai

kis qadar ḳhvāb meñ haiñ ahl-e-vatan kyā kahnā

phir saba guzri hai dar-e-sehn-e-chaman kya kahna

ab talak kanpte hain sarw-o-saman kya kahna

zarra-e-KHak hun main sail-e-hawadis ke liye

aur is zarre mein dil shah-e-zaman kya kahna

jism ke hukm se aazad ho jaan chaha tha

ruh ke hukm se aazad hai tan kya kahna

shahr viran hua gor-e-ghariban ki tarah

us pe main aur meri rangini-e-fan kya kahna

hai garan tab-e-shahidan pe mazar-o-marqad

jism KHun-basta hai KHud un ka kafan kya kahna

lek ye bhi to khule kuchh teri niyyat kya hai

nudrat-e-fikr aur andaz-e-suKHan kya kahna

aaKHirash sahl hua naf-o-zarar ka matlab

ab har ek chiz pe chaspan hai saman kya kahna

zist ek pal hai faqat dekhiye kya kijiye kya

aur is pal mein bhi sad ranj-o-mehan kya kahna

is qadar KHauf mein hun main ki na nind aawe hai

kis qadar KHwab mein hain ahl-e-watan kya kahna