پھر سے موسم کے بدلنے لگے تیور مولیٰ

پھر سے موسم کے بدلنے لگے تیور مولیٰ

اس کے شر سے رہے محفوظ مرا گھر مولیٰ

لوگ کہتے ہیں سیہ رات کو روز روشن

کیسے کر لوں میں غلط بات یہ باور مولیٰ

میری ہر شاخ سے پھولوں کی ہوئی ہے بارش

پھر بھی پھینکے ہیں مری ذات پہ پتھر مولیٰ

مفلسی دی ہے مجھے تیرا کرم ہے لیکن

لوگ ہنستے ہیں مرے حال پہ اکثر مولیٰ

سر بلندی مری اس وقت بھی قائم ہی رہی

تیغ پر جب وہ اٹھا لائے مرا سر مولیٰ

تشنہ کامی مرے ہونٹوں کا مقدر تو نہیں

بھیج دے ان کے لئے اب تو سمندر مولیٰ

تیرے عرفانؔ کو دنیا نہ کہے فرسودہ

پا بہ زنجیر روایت ہے یہ شاعر مولیٰ