phir shoala-e-gul mauj-e-saba chahiye yaro

phir sho.ala-e-gul mauj-e-sabā chāhiye yaaro

gulnār gulistāñ kī fazā chāhiye yaaro

pairāhan-e-jāñ chaak rahe tez havā meñ

tūfān meñ jiine kī adā chāhiye yaaro

matlūb ho gar shāhid-e-ma.anī kī tajallī

alfāz kī sad-rañg qabā chāhiye yaaro

shādāb na.ī rut se hai gulzār-e-adab bhī

phūloñ ko tar-o-tāza havā chāhiye yaaro

jitne bhī darīche haiñ sabhoñ ko na karo band

ik aadh darīcha to khulā chāhiye yaaro

shīshe kī koī chiiz salāmat na rahegī

is daur meñ patthar kī anā chāhiye yaaro

dil sañg-e-malāmat se hinā-rañg hai lekin

kuchh aur rifāqat kā sila chāhiye yaaro

phir shoala-e-gul mauj-e-saba chahiye yaro

gulnar gulistan ki faza chahiye yaro

pairahan-e-jaan chaak rahe tez hawa mein

tufan mein jine ki ada chahiye yaro

matlub ho gar shahid-e-mani ki tajalli

alfaz ki sad-rang qaba chahiye yaro

shadab nai rut se hai gulzar-e-adab bhi

phulon ko tar-o-taza hawa chahiye yaro

jitne bhi dariche hain sabhon ko na karo band

ek aadh daricha to khula chahiye yaro

shishe ki koi chiz salamat na rahegi

is daur mein patthar ki ana chahiye yaro

dil sang-e-malamat se hina-rang hai lekin

kuchh aur rifaqat ka sila chahiye yaro