phir suraj ne shahr pe apne qahr ka yun aaghaz kiya

phir sūraj ne shahr pe apne qahr kā yuuñ āġhāz kiyā

jin jin ke lambe dāman the un kā ifshā raaz kiyā

zahr-e-nasīhat tīr-e-malāmat dars-e-haqīqat sab ne diye

ek vahī thā jis ne merī har aadat par naaz kiyā

naqd-e-ta.alluq ḳhuub kamāyā lekin ḳharch are tauba

ye to batāo kal kī ḳhātir kyā kuchh pas-andāz kiyā

shahr meñ is kaifiyat kā hai kaun muharrik kuchh to kaho

jis kaifiyat ne tum ko dīvānoñ meñ mumtāz kiyā

kū-e-malāmat ke bāshinde tum ko sajda karte haiñ

kis ne is bastī meñ āḳhir aise sar-afrāz kiyā

dehlī meñ rahnā hai agar to tarz-e-mīr zarūrī hai

us ne bhī to ishq kiyā phir yaañ rahnā āġhāz kiyā

pahle uḌne kī dāvat dī tā-hadd-e-imkān 'sirāj'

phir jaane kyuuñ ḳhud hī us ne qat.a par-e-parvāz kiyā

phir suraj ne shahr pe apne qahr ka yun aaghaz kiya

jin jin ke lambe daman the un ka ifsha raaz kiya

zahr-e-nasihat tir-e-malamat dars-e-haqiqat sab ne diye

ek wahi tha jis ne meri har aadat par naz kiya

naqd-e-talluq KHub kamaya lekin KHarch are tauba

ye to batao kal ki KHatir kya kuchh pas-andaz kiya

shahr mein is kaifiyat ka hai kaun muharrik kuchh to kaho

jis kaifiyat ne tum ko diwanon mein mumtaz kiya

ku-e-malamat ke bashinde tum ko sajda karte hain

kis ne is basti mein aaKHir aise sar-afraaz kiya

dehli mein rahna hai agar to tarz-e-mir zaruri hai

us ne bhi to ishq kiya phir yan rahna aaghaz kiya

pahle uDne ki dawat di ta-hadd-e-imkan 'siraj'

phir jaane kyun KHud hi us ne qata par-e-parwaz kiya