phir taKHayyul yun kisi ka mujhko bahlane laga

phir taḳhayyul yuuñ kisī kā mujh ko bahlāne lagā

qurb jaise dūriyoñ kā ruup apnāne lagā

us ke chehre kī ziyā-pāshī ko shab meñ dekh kar

chāñdnī to chāñdnī hai chāñd sharmāne lagā

jaan kar toḌā kisī ne jab khilaunā pyaar kā

dil koī TuuTe khilaune hī se bahlāne lagā

ahl-e-mahfil kī nazar meñ jaise ik mujrim thī maiñ

uTh ke jab vo shoḳh pahlū se mire jaane lagā

bārhā tark-e-ta'alluq ke liye sochā magar

baḌh ke aage dil mirā mujh ko hī samjhāne lagā

Thokareñ khā kar huā māyūs jab vo ġhair se

zulf merī haath meñ le kar vo suljhāne lagā

dil-jaloñ kī saf meñ ai 'nasrīn' tū bhī aa ga.ī

ab tire rañg-e-taġhazzul meñ maza aane lagā

phir taKHayyul yun kisi ka mujh ko bahlane laga

qurb jaise duriyon ka rup apnane laga

us ke chehre ki ziya-pashi ko shab mein dekh kar

chandni to chandni hai chand sharmane laga

jaan kar toDa kisi ne jab khilauna pyar ka

dil koi TuTe khilaune hi se bahlane laga

ahl-e-mahfil ki nazar mein jaise ek mujrim thi main

uTh ke jab wo shoKH pahlu se mere jaane laga

barha tark-e-ta'alluq ke liye socha magar

baDh ke aage dil mera mujh ko hi samjhane laga

Thokaren kha kar hua mayus jab wo ghair se

zulf meri hath mein le kar wo suljhane laga

dil-jalon ki saf mein ai 'nasrin' tu bhi aa gai

ab tere rang-e-taghazzul mein maza aane laga