phir talash-e-rahat mein dard ka payam aaya

phir talāsh-e-rāhat meñ dard kā payām aayā

ham jahāñ se guzre the phir vahī maqām aayā

tere ġham kī rāhoñ meñ vo bhī ik maqām aayā

maut kī tamannā thī maut kā salām aayā

shab guzārne vaalo hāsil-e-sahar kyā thā

ik payām-e-bedārī vo bhī nā-tamām aayā

yuuñ uruuj par aa.ī dāstāñ mohabbat kī

dil kā zikr chheḌā thā lab pe un kā naam aayā

ham hī rah ga.e pyāse varna bazm-e-sāqī meñ

jis taraf na thā koī us taraf bhī jaam aayā

rafta rafta yaad un kī ban ga.ī ġham-e-duniyā

zindagī kā sarmāya zindagī ke kaam aayā

fasl-e-gul mubārak ho ye bhī dekhte rahiye

kis ne toḌ dī zanjīr kaun zer-e-dām aayā

mere jaam se 'shāhid' mai kabhī na chhalkī thī

mai-kashoñ kī mahfil meñ kaun tishna-kām aayā

phir talash-e-rahat mein dard ka payam aaya

hum jahan se guzre the phir wahi maqam aaya

tere gham ki rahon mein wo bhi ek maqam aaya

maut ki tamanna thi maut ka salam aaya

shab guzarne walo hasil-e-sahar kya tha

ek payam-e-bedari wo bhi na-tamam aaya

yun uruj par aai dastan mohabbat ki

dil ka zikr chheDa tha lab pe un ka nam aaya

hum hi rah gae pyase warna bazm-e-saqi mein

jis taraf na tha koi us taraf bhi jam aaya

rafta rafta yaad un ki ban gai gham-e-duniya

zindagi ka sarmaya zindagi ke kaam aaya

fasl-e-gul mubarak ho ye bhi dekhte rahiye

kis ne toD di zanjir kaun zer-e-dam aaya

mere jam se 'shahid' mai kabhi na chhalki thi

mai-kashon ki mahfil mein kaun tishna-kaam aaya