پھر ترے آستاں پہ لے آئی

پھر ترے آستاں پہ لے آئی

کھینچ کر لذت جبیں سائی

پیش و پس کو بہائے جاتا ہے

تیرا سیلاب رنگ و رعنائی

کوئی بیکس دعائیں دیتا ہے

وہ تری پرسش و پذیرائی

پھر سے بیتاب ہے دل شیدا

کسی بھولے ہوئے کی یاد آئی

ایک پردہ ہے خود فریبی کا

یہ مرا ذوق نغمہ پیرائی

مطلع صبح نو بہار بنے

اس مجسم حیا کی پیدائی

نظر احساس حسن سے مخمور

لعل خوش آب میں مسیحائی

دیدنی ہے ادائے محبوبی

سارے انداز ہیں زلیخائی

آفت عقل و ہوش ہے خالدؔ

اس پری رو کا حسن صحرائی