پھر انہیں شوق خودنمائی ہے

پھر انہیں شوق خودنمائی ہے

جانے کس کس کی موت آئی ہے

یہی معراج خودستائی ہے

اب انہیں دعوائے خدائی ہے

زلف شب گوں کی ظلمتوں میں ہوں گم

شمع رخ تک کہاں رسائی ہے

خار زاروں میں سر پٹکتا ہوں

یہ کمال شکستہ پائی ہے

زلف بکھری سی رنگ نکھرا سا

واہ کیا شان دل ربائی ہے

بات دل کی نہ لب پہ آئے کہیں

منہ سے نکلی تو پھر پرائی ہے

تم کو صبح وطن مبارک ہو

مجھ کو غربت میں شام آئی ہے

مل گیا درد لا زوال مجھے

دل نے کچھ ایسی چوٹ کھائی ہے

جام جم کو ہے اس سے کیا نسبت

یہ مرا کاسۂ گدائی ہے

مرحبا آج تم نے اے جوہرؔ

کیا مرصع غزل سنائی ہے