phir unhen shauq-e-KHud-numai hai

phir unheñ shauq-e-ḳhud-numā.ī hai

jaane kis kis kī maut aa.ī hai

yahī me.arāj-e-ḳhud-sitā.ī hai

ab unheñ da.avā-e-ḳhudā.ī hai

zulf-e-shab-gūñ kī zulmatoñ meñ huuñ gum

sham.a-e-ruḳh tak kahāñ rasā.ī hai

ḳhār-zāroñ meñ sar paTaktā huuñ

ye kamāl-e-shikasta-pā.ī hai

zulf bikhrī sī rang nikhrā sā

vaah kyā shān-e-dilrubā.ī hai

baat dil kī na lab pe aa.e kahīñ

muñh se niklī to phir parā.ī hai

tum ko sub.h-e-vatan mubārak ho

mujh ko ġhurbat meñ shaam aa.ī hai

mil gayā dard-e-lā-zavāl mujhe

dil ne kuchh aisī choT khaa.ī hai

jām-e-jam ko hai is se kyā nisbat

ye mirā kāsa-e-gadā.ī hai

marhabā aaj tum ne ai 'jauhar'

kyā murassā ġhazal sunā.ī hai

phir unhen shauq-e-KHud-numai hai

jaane kis kis ki maut aai hai

yahi mearaj-e-KHud-sitai hai

ab unhen dawa-e-KHudai hai

zulf-e-shab-gun ki zulmaton mein hun gum

shama-e-ruKH tak kahan rasai hai

KHar-zaron mein sar paTakta hun

ye kamal-e-shikasta-pai hai

zulf bikhri si rang nikhra sa

wah kya shan-e-dilrubai hai

baat dil ki na lab pe aae kahin

munh se nikli to phir parai hai

tum ko subh-e-watan mubarak ho

mujh ko ghurbat mein sham aai hai

mil gaya dard-e-la-zawal mujhe

dil ne kuchh aisi choT khai hai

jam-e-jam ko hai is se kya nisbat

ye mera kasa-e-gadai hai

marhaba aaj tum ne ai 'jauhar'

kya murassa ghazal sunai hai