phir uske baad badan tha na jaan jaan mein thi

phir us ke ba.ad badan thā na jaan jaan meñ thī

ajab chaḌhā.ī mirī umr kī Dhalān meñ thī

tumhārā aks mire āñsuoñ meñ raushan thā

tumhārī shakl bhī har vaqt mere dhyān meñ thī

tamām umr gañvā dī talāsh meñ us kī

jo ek shai na mirī thī na is jahān meñ thī

mujhe bayān bhī kartī thiiñ dūsrī āñkheñ

mirī zabān bhī shāyad kisī zabān meñ thī

vo DhūñDhtā thā jahāñ par vahāñ nahīñ thā maiñ

mirī kahānī kisī aur dāstān meñ thī

tanāb-e-ishq tire haath hī se chhūTī hai

tū ek umr se mashġhūl khīñch-tān meñ thī

hamāre pairoñ se khiskī huī zamīñ 'fayyāz'

utaar laa.e use ham jo āsmān meñ thī

phir us ke baad badan tha na jaan jaan mein thi

ajab chaDhai meri umr ki Dhalan mein thi

tumhaara aks mere aansuon mein raushan tha

tumhaari shakl bhi har waqt mere dhyan mein thi

tamam umr ganwa di talash mein us ki

jo ek shai na meri thi na is jahan mein thi

mujhe bayan bhi karti thin dusri aankhen

meri zaban bhi shayad kisi zaban mein thi

wo DhunDhta tha jahan par wahan nahin tha main

meri kahani kisi aur dastan mein thi

tanab-e-ishq tere hath hi se chhuTi hai

tu ek umr se mashghul khinch-tan mein thi

hamare pairon se khiski hui zamin 'fayyaz'

utar lae use hum jo aasman mein thi