phir wahi iztirab ki baaten

phir vahī iztirāb kī bāteñ

phir vahī pech-o-tāb kī bāteñ

mujh ko ab tak shabāb kī bāteñ

yaad haiñ jaise ḳhvāb kī bāteñ

zāhidoñ meñ bhī us kā hai mazkūr

har jagah haiñ sharāb kī bāteñ

kisī sūrat se bhūltī hī nahīñ

haa.e terī hijāb kī bāteñ

sab se vo guftugū-e-lutf-āmez

aur mujh se itaab kī bāteñ

ḳhāna-e-shauq kar chukīñ tārāj

dil-e-ḳhāna-ḳharāb kī bāteñ

naġhma-e-dil fidā-e-husn-e-ḳhayāl

kaisī chang-o-rabāb kī bāteñ

sāme.a-soz haiñ zamāna meñ

āj-kal inqalāb kī bāteñ

raas aa.iiñ mujhe muqaddar se

chashm-e-bad-dūr ḳhvāb kī bāteñ

sharh-e-tūfān-e-nūh kartī haiñ

merī chashm-e-pur-āb kī bāteñ

yaad aatī haiñ mujh ko piirī meñ

ga.ī guzrī shabāb kī bāteñ

intihā ho ga.ī gunāhoñ kī

ab to hoñ kuchh savāb kī bāteñ

kis se mehr-o-vafā kī ho ummīd

dil se kartā huuñ ḳhvāb kī bāteñ

mahv-e-zikr-e-sharāb haiñ zāhid

kar rahe haiñ savāb kī bāteñ

yaad ā.eñgī umr bhar 'mas.ūd'

kisī ḳhāna-ḳharāb kī bāteñ

phir wahi iztirab ki baaten

phir wahi pech-o-tab ki baaten

mujh ko ab tak shabab ki baaten

yaad hain jaise KHwab ki baaten

zahidon mein bhi us ka hai mazkur

har jagah hain sharab ki baaten

kisi surat se bhulti hi nahin

hae teri hijab ki baaten

sab se wo guftugu-e-lutf-amez

aur mujh se itab ki baaten

KHana-e-shauq kar chukin taraj

dil-e-KHana-KHarab ki baaten

naghma-e-dil fida-e-husn-e-KHayal

kaisi chang-o-rabab ki baaten

samea-soz hain zamana mein

aaj-kal inqalab ki baaten

ras aain mujhe muqaddar se

chashm-e-bad-dur KHwab ki baaten

sharh-e-tufan-e-nuh karti hain

meri chashm-e-pur-ab ki baaten

yaad aati hain mujh ko piri mein

gai guzri shabab ki baaten

intiha ho gai gunahon ki

ab to hon kuchh sawab ki baaten

kis se mehr-o-wafa ki ho ummid

dil se karta hun KHwab ki baaten

mahw-e-zikr-e-sharab hain zahid

kar rahe hain sawab ki baaten

yaad aaengi umr bhar 'masud'

kisi KHana-KHarab ki baaten