phir wahi lutf-e-KHalish ho wahi sozish dekhun

phir vahī lutf-e-ḳhalish ho vahī sozish dekhūñ

kyā bigāḌegī mirā charḳh kī gardish dekhūñ

tarz-e-bedād ne kuchh lutf diyā hai aisā

phir ye hasrat hai unheñ garm-e-navāzish dekhūñ

aap kī chashm-e-fusūñ-gar kā karam kyā kam hai

ab bhalā kis liye aflāk kī gardish dekhūñ

chashm-e-maḳhmūr kī kyā hosh-rubā.ī kam hai

hasrat-e-bāda karūñ jaam kī gardish dekhūñ

vo na aa.e na sahī ḳhud mujhe kab hai manzūr

dil-e-bīmār ko minnat-kash-e-pursish dekhūñ

ḳhūn-e-dil se ye ġhazal aaj likhī hai 'kaifī'

rang kyā lā.egā ye tarz-e-nigārish dekhūñ

phir wahi lutf-e-KHalish ho wahi sozish dekhun

kya bigaDegi mera charKH ki gardish dekhun

tarz-e-bedad ne kuchh lutf diya hai aisa

phir ye hasrat hai unhen garm-e-nawazish dekhun

aap ki chashm-e-fusun-gar ka karam kya kam hai

ab bhala kis liye aflak ki gardish dekhun

chashm-e-maKHmur ki kya hosh-rubai kam hai

hasrat-e-baada karun jam ki gardish dekhun

wo na aae na sahi KHud mujhe kab hai manzur

dil-e-bimar ko minnat-kash-e-pursish dekhun

KHun-e-dil se ye ghazal aaj likhi hai 'kaifi'

rang kya laega ye tarz-e-nigarish dekhun