phir wahi shaKHs mere KHwab mein aaya hoga

phir vahī shaḳhs mire ḳhvāb meñ aayā hogā

niiñd meñ us ne hī āñkhoñ ko rulāyā hogā

is amāvas meñ bhī mahtāb ugā hai ya.anī

us ne uñglī se kahīñ chāñd banāyā hogā

maiñ hī ab us ko samajh saktā huuñ us ko maiñ ne

yaad karte hue kis taur bhulāyā hogā

ek muddat se huuñ tanhā.ī-shudā kam-az-kam

phir abhī kis ne mire dil ko dukhāyā hogā

thak gayā hogā so dahshat meñ haiñ saare panchhī

āsmāñ jis ne ye kandhoñ pe uThāyā hogā

vo ḳhushī tum ne mohabbat meñ gañvā.ī hogī

tum ne ye dukh bhī mohabbat meñ gañvāyā hogā

muddateñ ho ga.iiñ tanqīd nahīñ karte log

kis ne ā.īnoñ ko ā.īna dikhāyā hogā

phir wahi shaKHs mere KHwab mein aaya hoga

nind mein us ne hi aankhon ko rulaya hoga

is amawas mein bhi mahtab uga hai yani

us ne ungli se kahin chand banaya hoga

main hi ab us ko samajh sakta hun us ko main ne

yaad karte hue kis taur bhulaya hoga

ek muddat se hun tanhai-shuda kam-az-kam

phir abhi kis ne mere dil ko dukhaya hoga

thak gaya hoga so dahshat mein hain sare panchhi

aasman jis ne ye kandhon pe uThaya hoga

wo KHushi tum ne mohabbat mein ganwai hogi

tum ne ye dukh bhi mohabbat mein ganwaya hoga

muddaten ho gain tanqid nahin karte log

kis ne aainon ko aaina dikhaya hoga