phiri hai kyon nigah-e-dilruba nahin malum

phirī hai kyoñ nigah-e-dilrubā nahīñ ma.alūm

hai is adā meñ bhī kis kī qazā nahīñ ma.alūm

guloñ se kis liye bigḌī sabā nahīñ ma.alūm

chalī ye baaġh meñ kaisī havā nahīñ ma.alūm

tumhīñ pe apnī hayāt-o-mamāt kā hai madār

hameñ to aur kuchh is ke sivā nahīñ ma.alūm

talab vo karte haiñ ā.īna ḳhair ho yā-rab

balā ye lā.egā kyā dūsrā nahīñ ma.alūm

tumhārī zulfeñ haiñ be-tarah raat se bal par

kareñgī kis ko asīr-e-balā nahīñ ma.alūm

jalā.e hasti-e-āshiq ko ye vo sho.ala hai

kuchh un ko shoḳhī-e-rang-e-hinā nahīñ ma.alūm

hamāre sāmne yaksāñ hai rutba-e-ruḳh-o-zulf

hameñ tafāvut-e-sub.h-o-masā nahīñ ma.alūm

savāl bosa tak un se kiyā na ham ne kabhī

vo kis ḳhatā pe haiñ ham se ḳhafā nahīñ ma.alūm

banā mazār bhī apnā to tere kūche meñ

mirī vafā tujhe kyā be-vafā nahīñ ma.alūm

jo raah pūchho to kahte haiñ rah-ravān-e-adam

batā.eñ kyā hameñ ḳhud rāstā nahīñ ma.alūm

hamārā haal bhī hairat-fazā hai ai hamdam

ki ashk jaarī haiñ aur mājrā nahīñ ma.alūm

ḳhushī ye hai ki vo kahte haiñ qatl kar ke mujhe

sazā to dī hai vale kuchh ḳhatā nahīñ ma.alūm

marīz-e-hijr se zid hai mire masīhā ko

vagarna kyā use is kī davā nahīñ ma.alūm

mumāna.at hai jo 'tālib' ko but-parastī kī

binā-e-ka.aba tujhe shaiḳh kyā nahīñ ma.alūm

phiri hai kyon nigah-e-dilruba nahin malum

hai is ada mein bhi kis ki qaza nahin malum

gulon se kis liye bigDi saba nahin malum

chali ye bagh mein kaisi hawa nahin malum

tumhin pe apni hayat-o-mamat ka hai madar

hamein to aur kuchh is ke siwa nahin malum

talab wo karte hain aaina KHair ho ya-rab

bala ye laega kya dusra nahin malum

tumhaari zulfen hain be-tarah raat se bal par

karengi kis ko asir-e-bala nahin malum

jalae hasti-e-ashiq ko ye wo shoala hai

kuchh un ko shoKHi-e-rang-e-hina nahin malum

hamare samne yaksan hai rutba-e-ruKH-o-zulf

hamein tafawut-e-subh-o-masa nahin malum

sawal bosa tak un se kiya na hum ne kabhi

wo kis KHata pe hain hum se KHafa nahin malum

bana mazar bhi apna to tere kuche mein

meri wafa tujhe kya be-wafa nahin malum

jo rah puchho to kahte hain rah-rawan-e-adam

bataen kya hamein KHud rasta nahin malum

hamara haal bhi hairat-faza hai ai hamdam

ki ashk jari hain aur majra nahin malum

KHushi ye hai ki wo kahte hain qatl kar ke mujhe

saza to di hai wale kuchh KHata nahin malum

mariz-e-hijr se zid hai mere masiha ko

wagarna kya use is ki dawa nahin malum

mumanat hai jo 'talib' ko but-parasti ki

bina-e-kaba tujhe shaiKH kya nahin malum