phirti hai justuju mein nasim-e-watan kahan

phirtī hai justujū meñ nasīm-e-vatan kahāñ

ab maiñ ḳhizāñ-rasīda kahāñ aur chaman kahāñ

is daur meñ vafā kī rusūm-e-kuhan kahāñ

mansūr bhī ab aa.e to dār-o-rasan kahāñ

aatā hai kaun hijr meñ ai zauq-e-intizār

daur-e-ḳhizāñ meñ sadr-nashīn-e-chaman kahāñ

mere ġhurūr-e-ishq meñ begāngī sahī

lekin tirī nigāh kā begāna-pan kahāñ

ḳhud hī miTā sake to miTā ai razā-e-dost

DhūñDe koī vasīla-e-dār-o-rasan kahāñ

maiñ aur terī anjuman-e-nāz kī talāsh

mere liye vo jannat-e-sarv-o-saman kahāñ

go zamzame hazār haiñ lekin sivā.e ishq

hāsil kisī se lazzat-e-kām-o-dahan kahāñ

shīrāza-band-e-dair-o-haram hai mirā niyāz

jo maiñ na huuñ to shaiḳh kahāñ barhaman kahāñ

jeb-e-saman darīda garebān-e-lāla chaak

mahfūz us nazar se koī pairahan kahāñ

jo un kī rahguzar meñ paḌe the paḌe rahe

jaate 'zafar' ye ḳhalvatiyān-e-chaman kahāñ

phirti hai justuju mein nasim-e-watan kahan

ab main KHizan-rasida kahan aur chaman kahan

is daur mein wafa ki rusum-e-kuhan kahan

mansur bhi ab aae to dar-o-rasan kahan

aata hai kaun hijr mein ai zauq-e-intizar

daur-e-KHizan mein sadr-nashin-e-chaman kahan

mere ghurur-e-ishq mein begangi sahi

lekin teri nigah ka begana-pan kahan

KHud hi miTa sake to miTa ai raza-e-dost

DhunDe koi wasila-e-dar-o-rasan kahan

main aur teri anjuman-e-naz ki talash

mere liye wo jannat-e-sarw-o-saman kahan

go zamzame hazar hain lekin siwae ishq

hasil kisi se lazzat-e-kaam-o-dahan kahan

shiraaza-band-e-dair-o-haram hai mera niyaz

jo main na hun to shaiKH kahan barhaman kahan

jeb-e-saman darida gareban-e-lala chaak

mahfuz us nazar se koi pairahan kahan

jo un ki rahguzar mein paDe the paDe rahe

jate 'zafar' ye KHalwatiyan-e-chaman kahan