phir chhiDi raat baat phulon ki

phir chhiḌī raat baat phūloñ kī

raat hai yā barāt phūloñ kī

phuul ke haar phuul ke gajre

shaam phūloñ kī raat phūloñ kī

aap kā saath saath phūloñ kā

aap kī baat baat phūloñ kī

nazreñ miltī haiñ jaam milte haiñ

mil rahī hai hayāt phūloñ kī

kaun detā hai jaan phūloñ par

kaun kartā hai baat phūloñ kī

vo sharāfat to dil ke saath ga.ī

luT ga.ī kā.enāt phūloñ kī

ab kise hai dimāġh-e-tohmat-e-ishq

kaun suntā hai baat phūloñ kī

mere dil meñ surūr-e-sub.h-e-bahār

terī āñkhoñ meñ raat phūloñ kī

phuul khilte raheñge duniyā meñ

roz niklegī baat phūloñ kī

ye mahaktī huī ġhazal 'maḳhdūm'

jaise sahrā meñ raat phūloñ kī

phir chhiDi raat baat phulon ki

raat hai ya baraat phulon ki

phul ke haar phul ke gajre

sham phulon ki raat phulon ki

aap ka sath sath phulon ka

aap ki baat baat phulon ki

nazren milti hain jam milte hain

mil rahi hai hayat phulon ki

kaun deta hai jaan phulon par

kaun karta hai baat phulon ki

wo sharafat to dil ke sath gai

luT gai kaenat phulon ki

ab kise hai dimagh-e-tohmat-e-ishq

kaun sunta hai baat phulon ki

mere dil mein surur-e-subh-e-bahaar

teri aankhon mein raat phulon ki

phul khilte rahenge duniya mein

roz niklegi baat phulon ki

ye mahakti hui ghazal 'maKHdum'

jaise sahra mein raat phulon ki