phul bhare hain daman daman

phuul bhare haiñ dāman dāman

lekin vīrāñ vīrāñ gulshan

ishq kī mastī dil kī dhaḌkan

ek javānī do do joban

dekhe haiñ sab shaiḳh-o-barahman

naam baḌe aur chhoTe darshan

kaun kisī ke dukh kā sāthī

apne aañsū apnā dāman

zabt ne jab bhī hoñT siye haiñ

tez huī hai dil kī dhaḌkan

gorā mukhḌā kaalī zulfeñ

sub.h ke dar par shaam kī chilman

gulshan ke matvāle haiñ ham

phuul bhī gulshan ḳhaar bhī gulshan

aql kī bāteñ karne vaale

kyā samjheñge dil kī dhaḌkan

husn aur ishq meñ farq yahī hai

ek hai shīsha ek hai aahan

tan ke ujle man ke maile

ye haiñ vaa.iz jī ke lachchhan

aql ne aksar dil ko kosā

naach na jaane TeḌhā āñgan

tan-man tum par vaar diye haiñ

us kā sab kuchh jis kā tan-man

terā dāman chhoḌūñ kaise

merī duniyā terā dāman

ruuTh ke jaane vaale āḳhir

apnoñ se kyuuñ itnī an-ban

terī yaad kā nuur thā varna

hijr kī zulmat aur ho raushan

aaj 'sahar' aanā hai kis ko

raushan hai kyuuñ merā āñgan

phul bhare hain daman daman

lekin viran viran gulshan

ishq ki masti dil ki dhaDkan

ek jawani do do joban

dekhe hain sab shaiKH-o-barahman

nam baDe aur chhoTe darshan

kaun kisi ke dukh ka sathi

apne aansu apna daman

zabt ne jab bhi honT siye hain

tez hui hai dil ki dhaDkan

gora mukhDa kali zulfen

subh ke dar par sham ki chilman

gulshan ke matwale hain hum

phul bhi gulshan KHar bhi gulshan

aql ki baaten karne wale

kya samjhenge dil ki dhaDkan

husn aur ishq mein farq yahi hai

ek hai shisha ek hai aahan

tan ke ujle man ke maile

ye hain waiz ji ke lachchhan

aql ne aksar dil ko kosa

nach na jaane TeDha aangan

tan-man tum par war diye hain

us ka sab kuchh jis ka tan-man

tera daman chhoDun kaise

meri duniya tera daman

ruTh ke jaane wale aaKHir

apnon se kyun itni an-ban

teri yaad ka nur tha warna

hijr ki zulmat aur ho raushan

aaj 'sahar' aana hai kis ko

raushan hai kyun mera aangan