phul chehra aansuon se dho gae

phuul chehra āñsuoñ se dho ga.e

aa.e the hañsne chaman meñ ro ga.e

dil ye ujḌā hai ki un kī yaad ko

muddateñ guzrīñ zamāne ho ga.e

kis liye mahfil meñ itnī barhamī

ham chale jaate haiñ uTh kar lo ga.e

jab chaleñge kāTne kal fasl ko

tab khulegā aaj kyā kyā bo ga.e

koī Thahrā hai kisī ke vāste

kah rahe the jā.eñge ham so ga.e

DhūñDte kyā gosha-e-maqsūd ko

raah kī rañgīniyoñ meñ kho ga.e

kis liye aa.e the yaañ taqdīr meñ

bojh Dhonā jism kā thā Dho ga.e

chhoḌnā mumkin na thā stage ko

rol apnā karte karte so ga.e

tiin sāthī jā rahe the saath saath

ek baaqī rah gayā hai do ga.e

kyā yahī hai dār-e-fānī kī kashish

phir na lauTe us taraf ko jo ga.e

kar rahā hai ik jahāñ jin kā tavāf

but-kade meñ kis ke darshan ko ga.e

aap āzurda hue 'hāmid' ḳhafā

lījiye donoñ barābar ho ga.e

phul chehra aansuon se dho gae

aae the hansne chaman mein ro gae

dil ye ujDa hai ki un ki yaad ko

muddaten guzrin zamane ho gae

kis liye mahfil mein itni barhami

hum chale jate hain uTh kar lo gae

jab chalenge kaTne kal fasl ko

tab khulega aaj kya kya bo gae

koi Thahra hai kisi ke waste

kah rahe the jaenge hum so gae

DhunDte kya gosha-e-maqsud ko

rah ki ranginiyon mein kho gae

kis liye aae the yan taqdir mein

bojh Dhona jism ka tha Dho gae

chhoDna mumkin na tha stage ko

rol apna karte karte so gae

tin sathi ja rahe the sath sath

ek baqi rah gaya hai do gae

kya yahi hai dar-e-fani ki kashish

phir na lauTe us taraf ko jo gae

kar raha hai ek jahan jin ka tawaf

but-kade mein kis ke darshan ko gae

aap aazurda hue 'hamid' KHafa

lijiye donon barabar ho gae