phul hain hum bahaar hain hum log

phuul haiñ ham bahār haiñ ham log

ḳhushnumā ḳhush-gavār haiñ ham log

shā.ir-e-dil-figār haiñ ham log

fitratan sho.ala-bār haiñ ham log

muuñd kar āñkheñ khol dete haiñ

ġhāfil-o-hoshiyār haiñ ham log

ham se kyā pūchhte ho hāl-e-dil

dāstān-e-hazār haiñ ham log

zīnat-e-anjuman agar haiñ aap

raunaq-e-bazm-e-yār haiñ ham log

ḳhuub achchhī tarah samajh liije

vaqt kī ik pukār haiñ ham log

yā tirī yaad dil meñ rahtī hai

yā taġhāful-shi.ār haiñ ham log

yā haiñ apne vatan meñ ai 'hamdam'

yā ġharīb-ud-dayār haiñ ham log

phul hain hum bahaar hain hum log

KHushnuma KHush-gawar hain hum log

shair-e-dil-figar hain hum log

fitratan shoala-bar hain hum log

mund kar aankhen khol dete hain

ghafil-o-hoshiyar hain hum log

hum se kya puchhte ho haal-e-dil

dastan-e-hazar hain hum log

zinat-e-anjuman agar hain aap

raunaq-e-bazm-e-yar hain hum log

KHub achchhi tarah samajh lije

waqt ki ek pukar hain hum log

ya teri yaad dil mein rahti hai

ya taghaful-shiar hain hum log

ya hain apne watan mein ai 'hamdam'

ya gharib-ud-dayar hain hum log