phul jalte hain kahin barg-o-samar jalte hain

phuul jalte haiñ kahīñ barg-o-samar jalte haiñ

fasl-e-gul aa.ī hai bāġhoñ meñ shajar jalte haiñ

allah allāh jabīn-e-ruḳh-e-jānāñ kī tapish

aisā lagtā hai ki ab shams-o-qamar jalte haiñ

kyā ġhazab hai ki tire shahr meñ ai jān-e-ġhazal

jism-o-jāñ zehn-o-nazar qalb-o-jigar jalte haiñ

jis taraf dekhiye ik aag kā dariyā hai ravāñ

rāste ḳhuun meñ Duube haiñ nagar jalte haiñ

bujh chukā huuñ maiñ magar ab bhī mire naqsh-e-qadam

dekh lo jā ke sar-e-rāhguzar jalte haiñ

jin ke sīnoñ meñ farozāñ hai vafā kī sham.eñ

roz-o-shab jalte haiñ vo shām-o-sahar jalte haiñ

aap jis shahr ko pur-amn samajhte haiñ huzūr

vāqi.a ye hai usī shahr meñ ghar jalte haiñ

daf.atan niiñd se maiñ chauñk uThā ai 'aḳhtar'

maiñ ne jab ḳhvāb meñ dekhā ki hunar jalte haiñ

phul jalte hain kahin barg-o-samar jalte hain

fasl-e-gul aai hai baghon mein shajar jalte hain

allah allah jabin-e-ruKH-e-jaanan ki tapish

aisa lagta hai ki ab shams-o-qamar jalte hain

kya ghazab hai ki tere shahr mein ai jaan-e-ghazal

jism-o-jaan zehn-o-nazar qalb-o-jigar jalte hain

jis taraf dekhiye ek aag ka dariya hai rawan

raste KHun mein Dube hain nagar jalte hain

bujh chuka hun main magar ab bhi mere naqsh-e-qadam

dekh lo ja ke sar-e-rahguzar jalte hain

jin ke sinon mein farozan hai wafa ki shamen

roz-o-shab jalte hain wo sham-o-sahar jalte hain

aap jis shahr ko pur-amn samajhte hain huzur

waqia ye hai usi shahr mein ghar jalte hain

dafatan nind se main chaunk uTha ai 'aKHtar'

main ne jab KHwab mein dekha ki hunar jalte hain