phul jo sahn-e-bayaban mein jawan hota hai

phuul jo sahn-e-bayābāñ meñ javāñ hotā hai

‘azmat-e-fasl-e-bahārāñ kā nishāñ hotā hai

qatra-e-ashk ko samjho na zarā sā paanī

qatra-e-ashk ġham-e-dil kī zabāñ hotā hai

haiñ ye be-kār sabhī dair-o-haram ke jhagḌe

lā-makāñ ho jo kahīñ us kā makān hotā hai

jab bhī aatī hai kabhī fasl-e-bahārāñ ai dost

ās-pās us ke kahīñ daur-e-ḳhizāñ hotā hai

jaane kyā soch ke ho jaatā huuñ maiñ bhī ġhamgīñ

jab bhī mahfil meñ kabhī zikr-e-butāñ hotā hai

aaj ke daur meñ insān na DhūñDo yaaro

aaj ke daur meñ insān kahāñ hotā hai

apnī tahzīb kī ye āḳhirī manzil hai 'kañval'

reg-zāroñ pe bahāroñ kā gumāñ hotā hai

phul jo sahn-e-bayaban mein jawan hota hai

‘azmat-e-fasl-e-bahaaran ka nishan hota hai

qatra-e-ashk ko samjho na zara sa pani

qatra-e-ashk gham-e-dil ki zaban hota hai

hain ye be-kar sabhi dair-o-haram ke jhagDe

la-makan ho jo kahin us ka makan hota hai

jab bhi aati hai kabhi fasl-e-bahaaran ai dost

aas-pas us ke kahin daur-e-KHizan hota hai

jaane kya soch ke ho jata hun main bhi ghamgin

jab bhi mahfil mein kabhi zikr-e-butan hota hai

aaj ke daur mein insan na DhunDo yaro

aaj ke daur mein insan kahan hota hai

apni tahzib ki ye aaKHiri manzil hai 'kanwal'

reg-zaron pe bahaaron ka guman hota hai