phul juDe mein jab sajaana hai

phuul juuḌe meñ jab sajānā hai

pahle tum ne mujhe batānā hai

mere ajdād ne bhī maanā hai

ishq dhanda bahut purānā hai

dars maañ baap ne diyā hai mujhe

girte har shaḳhs ko uThānā hai

mil ke dushman se sāzisheñ kar lo

maiñ ne āḳhir ko jiit jaanā hai

ruḳh havāoñ kī samt karte hue

ik diyā maiñ ne phir jalānā hai

shor hotā hai yuuñ pas-e-dīvār

pas-e-dīvār ik zamāna hai

phuul bikhre paḌe haiñ raste meñ

aaj shāyad kisī ne aanā hai

kyā bigāḌeñge ġham bhalā us kā

jis kī qismat meñ muskurānā hai

laakh duniyā lagā.e ta.azīreñ

amn kā giit maiñ ne gaanā hai

kaam se fursateñ nahīñ 'ābid'

abhī bachchoñ ko bhī paḌhānā hai

phul juDe mein jab sajaana hai

pahle tum ne mujhe batana hai

mere ajdad ne bhi mana hai

ishq dhanda bahut purana hai

dars man bap ne diya hai mujhe

girte har shaKHs ko uThana hai

mil ke dushman se sazishen kar lo

main ne aaKHir ko jit jaana hai

ruKH hawaon ki samt karte hue

ek diya main ne phir jalana hai

shor hota hai yun pas-e-diwar

pas-e-diwar ek zamana hai

phul bikhre paDe hain raste mein

aaj shayad kisi ne aana hai

kya bigaDenge gham bhala us ka

jis ki qismat mein muskurana hai

lakh duniya lagae taziren

amn ka git main ne gana hai

kaam se fursaten nahin 'abid'

abhi bachchon ko bhi paDhana hai