پھول کا روپ خزاں میں بھی نکھر سکتا ہے

پھول کا روپ خزاں میں بھی نکھر سکتا ہے

یہ مقدر ہے کسی وقت سنور سکتا ہے

عشق کامل ہو تو حارج نہیں ہوتی موجیں

بہتا دریا بھی بلا روک ٹھہر سکتا ہے

یہ کرشمہ بھی مرے رب نے دکھایا سب کو

ظلم کا دیو بلا موت بھی مر سکتا ہے

خواب کی چھاؤں میں بزدل ہی جیا کرتے ہیں

خواب تو خواب ہے اک پل میں بکھر سکتا ہے

ہر اندھیرے میں نکل آتا ہے روشن پہلو

کفر کی آگ میں ایمان سنور سکتا ہے

تنگ دل یار پہ مضطرؔ نہ بھروسہ کرنا

وقت کے ساتھ یہ وعدوں سے مکر سکتا ہے