phul khilte hain to aati hai sada raat gae

phuul khilte haiñ to aatī hai sadā raat ga.e

dil ke āñgan meñ barastī hai ghaTā raat ga.e

apne hāthoñ se hilā kar jinheñ kholā tum ne

un kivāḌoñ se bhī aatī hai havā raat ga.e

jism-e-nāzuk pe chamakte haiñ sitāre kyā kyā

āsmāñ khol ke niklā hai qabā raat ga.e

din ko chaḌhte hue sūraj kā bhī jhelā hai azaab

Dūbte tāroñ kī dekhī hai ziyā raat ga.e

gūñjtī haiñ mire kānoñ meñ sadā.eñ kaisī

kaun kartā hai yahāñ roz duā raat ga.e

kaun rotā hai mire dil ke nihāñ-ḳhāne meñ

kis liye hotī hai ye āh-o-bukā raat ga.e

mujh ko kar detā hai vo mere muqābil 'ajmal'

chhīn letā hai koī merī ridā raat ga.e

phul khilte hain to aati hai sada raat gae

dil ke aangan mein barasti hai ghaTa raat gae

apne hathon se hila kar jinhen khola tum ne

un kiwaDon se bhi aati hai hawa raat gae

jism-e-nazuk pe chamakte hain sitare kya kya

aasman khol ke nikla hai qaba raat gae

din ko chaDhte hue suraj ka bhi jhela hai azab

Dubte taron ki dekhi hai ziya raat gae

gunjti hain mere kanon mein sadaen kaisi

kaun karta hai yahan roz dua raat gae

kaun rota hai mere dil ke nihan-KHane mein

kis liye hoti hai ye aah-o-buka raat gae

mujh ko kar deta hai wo mere muqabil 'ajmal'

chhin leta hai koi meri rida raat gae