phul khilte hi kaTa shaKH se aur mol bika

phuul khilte hī kaTā shāḳh se aur mol bikā

lutf-e-hastī hai kalī ko gul-e-tar hone tak

safar-e-zīst kī āḳhir hai ġharaz ġhāyat kyā

raaz khultā nahīñ anjām-e-safar hone tak

tū hai āġhosh meñ us kī tujhe ehsās nahīñ

bebasī hai terī murshid kī nazar hone tak

yā ḳhudā kar na mujhe kaif-e-duā se mahrūm

ki duā.eñ haiñ duāoñ kā asar hone tak

par-e-parvāz nikal aa.e jūñhī nīche girā

aadam afsurda rahā ḳhuld-badar hone tak

jaag uThe to kahāñ ālam-e-nairañg-e-ḳhayāl

tābish-e-mahfil-e-anjum hai sahar hone tak

phul khilte hi kaTa shaKH se aur mol bika

lutf-e-hasti hai kali ko gul-e-tar hone tak

safar-e-zist ki aaKHir hai gharaz ghayat kya

raaz khulta nahin anjam-e-safar hone tak

tu hai aaghosh mein us ki tujhe ehsas nahin

bebasi hai teri murshid ki nazar hone tak

ya KHuda kar na mujhe kaif-e-dua se mahrum

ki duaen hain duaon ka asar hone tak

par-e-parwaz nikal aae junhi niche gira

aadam afsurda raha KHuld-badar hone tak

jag uThe to kahan aalam-e-nairang-e-KHayal

tabish-e-mahfil-e-anjum hai sahar hone tak