phul KHushbu chand jugnu aur sitare aa gae

phuul ḳhushbū chāñd jugnū aur sitāre aa ga.e

aap kyā aa.e ḳhushī ke isti.āre aa ga.e

yaas ke gahre samundar se nikalnā thā muhāl

aap ne chāhā umīdoñ ke kināre aa ga.e

apnī saarī nekiyāñ un ke havāle ho ga.iiñ

un ke sab ilzām lekin sar hamāre aa ga.e

band apnā dar kiyā jab ik amīr-e-shahr ne

merī ḳhātir mere maulā ke sahāre aa ga.e

television dekh kar hone lage bachche javān

sātvīñ meñ un ko bhī bāliġh ishāre aa ga.e

bhar ga.ī haiñ jholiyāñ dil kī murādoñ se 'munīr'

un ke dar pe jab kabhī dāman pasāre aa ga.e

phul KHushbu chand jugnu aur sitare aa gae

aap kya aae KHushi ke istiare aa gae

yas ke gahre samundar se nikalna tha muhaal

aap ne chaha umidon ke kinare aa gae

apni sari nekiyan un ke hawale ho gain

un ke sab ilzam lekin sar hamare aa gae

band apna dar kiya jab ek amir-e-shahr ne

meri KHatir mere maula ke sahaare aa gae

telewision dekh kar hone lage bachche jawan

satwin mein un ko bhi baaligh ishaare aa gae

bhar gai hain jholiyan dil ki muradon se 'munir'

un ke dar pe jab kabhi daman pasare aa gae