phul KHushbu chandni mahtab wo

phuul ḳhushbū chāñdnī mahtāb vo

par mirī ḳhātir hai koī ḳhvāb vo

apnī apnī uljhanoñ meñ yaar gum

ab kahāñ hai halqa-e-ahbāb vo

is qadar betāb āḳhir kis liye

ye nahīñ hai ai dil-e-be-tāb vo

bujh gayā kuchh dil bhī ab ke hijr meñ

aur chehre par kahāñ hai taab vo

ek sahrā kī tarah maiñ tishna-lab

ek naddī kī tarah sairāb vo

dushman-e-jāñ hai magar achchhā lagā

jāntā hai kuchh adab ādāb vo

jāgne kā kaam mujh ko sauñp kar

dekhtā rahtā hai mere ḳhvāb vo

maiñ huuñ arzāñ sāhiloñ kī ret sā

aur koī gauhar-e-nāyāb vo

duur tak 'fārūq' taptī ret hai

ab yahāñ aate nahīñ sailāb vo

phul KHushbu chandni mahtab wo

par meri KHatir hai koi KHwab wo

apni apni uljhanon mein yar gum

ab kahan hai halqa-e-ahbab wo

is qadar betab aaKHir kis liye

ye nahin hai ai dil-e-be-tab wo

bujh gaya kuchh dil bhi ab ke hijr mein

aur chehre par kahan hai tab wo

ek sahra ki tarah main tishna-lab

ek naddi ki tarah sairab wo

dushman-e-jaan hai magar achchha laga

jaanta hai kuchh adab aadab wo

jagne ka kaam mujh ko saunp kar

dekhta rahta hai mere KHwab wo

main hun arzan sahilon ki ret sa

aur koi gauhar-e-nayab wo

dur tak 'faruq' tapti ret hai

ab yahan aate nahin sailab wo