phul kya chiz hai kali kya hai

phuul kyā chiiz hai kalī kyā hai

bin tumhāre ye zindagī kyā hai

ujḌe dil se zarā koī pūchhe

suune sahrā meñ dil-lagī kyā hai

vo jo nauha paḌhā kare bulbul

kyā batā.egā naġhmagī kyā hai

merī guftār sidq-e-paiham hai

phir ye sūraj kī raushnī kyā hai

gar taraddud ho aazmā dekho

haath kañgan ko aarsī kyā hai

merī āñkhoñ meñ paḌ ga.e halqe

koī pūchhe ki dil-lagī kyā hai

parda chehra se thoḌā sarkā do

ham bhī dekheñ ki mai-kashī kyā hai

ek purza sahī magar likh do

paḌhe likkhe ko fārsī kyā hai

jām-e-dīdār ab pilā bhī do

had se baḌh kar ye be-ruḳhī kyā hai

yak-ba-yak aa ga.ī 'falak se sadā

ye shikāyat kī phuljhaḌī kyā hai

phul kya chiz hai kali kya hai

bin tumhaare ye zindagi kya hai

ujDe dil se zara koi puchhe

sune sahra mein dil-lagi kya hai

wo jo nauha paDha kare bulbul

kya bataega naghmagi kya hai

meri guftar sidq-e-paiham hai

phir ye suraj ki raushni kya hai

gar taraddud ho aazma dekho

hath kangan ko aarsi kya hai

meri aankhon mein paD gae halqe

koi puchhe ki dil-lagi kya hai

parda chehra se thoDa sarka do

hum bhi dekhen ki mai-kashi kya hai

ek purza sahi magar likh do

paDhe likkhe ko farsi kya hai

jam-e-didar ab pila bhi do

had se baDh kar ye be-ruKHi kya hai

yak-ba-yak aa gai 'falak se sada

ye shikayat ki phuljhaDi kya hai