phul sab murjha gae hain titliyan KHamosh hain

phuul sab murjhā ga.e haiñ titliyāñ ḳhāmosh haiñ

ḳhvāb mere TūTne par kirchiyāñ ḳhāmosh haiñ

karvaTeñ liiñ vaqt ne phir hijrateñ karnī paḌīñ

merī bastī luT ga.ī sab bastiyāñ ḳhāmosh haiñ

ek muddat se is āñgan meñ hai vīrānī bapā

jhūle ḳhālī jhul rahe haiñ kursiyāñ ḳhāmosh haiñ

kyā huā ye anjuman meñ kaun sāhab aa ga.e

haath hilte dikh rahe haiñ tāliyāñ ḳhāmosh haiñ

uf qabīle ke baḌoñ kī noch Daalī dāḌhiyāñ

sānahe par Topiyāñ aur pagḌiyāñ ḳhāmosh haiñ

mere mausam ne chalī hai chaal phir koī na.ī

itnī tez āñdhī hai phir bhī khiḌkiyāñ ḳhāmosh haiñ

muddatoñ se ye imārat band hai 'ābis' miyāñ

taale zang-ālūd haiñ aur chābiyāñ ḳhāmosh haiñ

phul sab murjha gae hain titliyan KHamosh hain

KHwab mere TuTne par kirchiyan KHamosh hain

karwaTen lin waqt ne phir hijraten karni paDin

meri basti luT gai sab bastiyan KHamosh hain

ek muddat se is aangan mein hai virani bapa

jhule KHali jhul rahe hain kursiyan KHamosh hain

kya hua ye anjuman mein kaun sahab aa gae

hath hilte dikh rahe hain taliyan KHamosh hain

uf qabile ke baDon ki noch Dali daDhiyan

sanahe par Topiyan aur pagDiyan KHamosh hain

mere mausam ne chali hai chaal phir koi nai

itni tez aandhi hai phir bhi khiDkiyan KHamosh hain

muddaton se ye imarat band hai 'abis' miyan

tale zang-alud hain aur chabiyan KHamosh hain