پھول سمجھے تھے خار نکلا ہے

پھول سمجھے تھے خار نکلا ہے

جان لیوا یہ پیار نکلا ہے

تیر چھوڑا نہیں ابھی ہم نے

تو یہ کیا آر پار نکلا ہے

میری حالت پہ آئنہ رویا

کوئی تو غم گسار نکلا ہے

دام دو دل کے دل کو لے جاؤ

ایسا بھی اشتہار نکلا ہے

جذبہ وحشت کا تھام کر مجھ کو

آج پھر سوئے دار نکلا ہے

راہ میں بیٹھا ہوں مگر اس کو

ڈھونڈنے انتظار نکلا ہے

حسرتیں مر چکیں مگر ان کے

دل کے اندر مزار نکلا ہے

جو بھی نکلا ہے اس کی محفل سے

جانے کیوں اشک بار نکلا ہے