phulon ki narm chhaon mein jalta raha badan

phūloñ kī narm chhāoñ meñ jaltā rahā badan

fitrat meñ sang ho ke pighaltā rahā badan

‘aish-o-tarab ke saa.e meñ paltī rahī hayāt

hirs-o-havas kī aag meñ jaltā rahā badan

murda zamīr ho ga.e hālāt ke sabab

poshāk maslahat kī badaltā rahā badan

bahr-e-tafakkurāt kī yūrish na pūchhiye

paanī meñ rah ke aag ugaltā rahā badan

duniyā kī dhuup chhāoñ meñ rahne ke baa'd bhī

ġhunche kī tarh phūltā phaltā rahā badan

sarv o saman shagūfa gul-o-lāla nastaran

kitne hī zāviyoñ meñ vo Dhaltā rahā badan

maazī ke nashtaroñ ke kachokoñ se ai 'adīm'

ho kar lahūluhān machaltā rahā badan

phulon ki narm chhaon mein jalta raha badan

fitrat mein sang ho ke pighalta raha badan

‘aish-o-tarab ke sae mein palti rahi hayat

hirs-o-hawas ki aag mein jalta raha badan

murda zamir ho gae haalat ke sabab

poshak maslahat ki badalta raha badan

bahr-e-tafakkuraat ki yurish na puchhiye

pani mein rah ke aag ugalta raha badan

duniya ki dhup chhaon mein rahne ke ba'd bhi

ghunche ki tarh phulta phalta raha badan

sarw o saman shagufa gul-o-lala nastaran

kitne hi zawiyon mein wo Dhalta raha badan

mazi ke nashtaron ke kachokon se ai 'adim'

ho kar lahuluhan machalta raha badan