phulon ki talab mein thoDa sa aazar nahin to kuchh bhi nahin

phūloñ kī talab meñ thoḌā sā āzār nahīñ to kuchh bhī nahīñ

ḳhud aa ke jo uljhe dāman se vo ḳhaar nahīñ to kuchh bhī nahīñ

ho din kī fazāoñ kā sargam yā bhīgtī rātoñ kā aalam

kitnā hī suhānā ho mausam dildār nahīñ to kuchh bhī nahīñ

kyuuñ ahl-e-sitam kā dil toḌeñ phir shahr meñ chal kar sar phoḌeñ

sahrā-e-junūñ ko ab chhoḌeñ dīvār nahīñ to kuchh bhī nahīñ

har mauj-e-balā ik sāhil hai girdāb hī apnā hāsil hai

ye kashti-e-dil vo qātil hai mañjhdār nahīñ to kuchh bhī nahīñ

kyā mīThe bol sunāte ho kyā giit anokhe gaate ho

kyā naġhmoñ par itrāte ho jhankār nahīñ to kuchh bhī nahīñ

ye naam o numūd kī ḳhvāhish kyā ye ilm o fan kī numā.ish kyā

apnā to aqīda hai ye 'sahar' meyār nahīñ to kuchh bhī nahīñ

phulon ki talab mein thoDa sa aazar nahin to kuchh bhi nahin

KHud aa ke jo uljhe daman se wo KHar nahin to kuchh bhi nahin

ho din ki fazaon ka sargam ya bhigti raaton ka aalam

kitna hi suhana ho mausam dildar nahin to kuchh bhi nahin

kyun ahl-e-sitam ka dil toDen phir shahr mein chal kar sar phoDen

sahra-e-junun ko ab chhoDen diwar nahin to kuchh bhi nahin

har mauj-e-bala ek sahil hai girdab hi apna hasil hai

ye kashti-e-dil wo qatil hai manjhdar nahin to kuchh bhi nahin

kya miThe bol sunate ho kya git anokhe gate ho

kya naghmon par itraate ho jhankar nahin to kuchh bhi nahin

ye nam o numud ki KHwahish kya ye ilm o fan ki numaish kya

apna to aqida hai ye 'sahar' meyar nahin to kuchh bhi nahin