phulon mein jhalak husn-e-ruKH-e-yar ki nikli

phūloñ meñ jhalak husn-e-ruḳh-e-yār kī niklī

ham ḳhush haiñ koī shakl to dīdār kī niklī

alfāz se ḳhushbū tire kirdār kī niklī

jab baat masīhā tire guftār kī niklī

nīlām hue chāñd har ik shahr meñ lekin

raunaq na kahīñ misr ke bāzār kī niklī

hoñToñ kī hañsī bin ga.e jo zaḳhm the dil meñ

sūrat koī jab aur na iz.hār kī niklī

dekhā to ye samjhe kisī darvesh kā ghar hai

pūchhā to vo kuTiyā bhī zamīñdār kī niklī

phir phuul barasne lage lafzoñ ke dahan se

phir baat kisī ke lab-o-ruḳhsār kī niklī

zanjīr kī tañgī thī asīrān-e-vafā the

āvāz bhī zindāñ se na jhankār kī niklī

phulon mein jhalak husn-e-ruKH-e-yar ki nikli

hum KHush hain koi shakl to didar ki nikli

alfaz se KHushbu tere kirdar ki nikli

jab baat masiha tere guftar ki nikli

nilam hue chand har ek shahr mein lekin

raunaq na kahin misr ke bazar ki nikli

honTon ki hansi bin gae jo zaKHm the dil mein

surat koi jab aur na izhaar ki nikli

dekha to ye samjhe kisi darwesh ka ghar hai

puchha to wo kuTiya bhi zamindar ki nikli

phir phul barasne lage lafzon ke dahan se

phir baat kisi ke lab-o-ruKHsar ki nikli

zanjir ki tangi thi asiran-e-wafa the

aawaz bhi zindan se na jhankar ki nikli