phulon se lahu kaise Tapakta hua dekhun

phūloñ se lahū kaise Tapaktā huā dekhūñ

āñkhoñ ko bujhā luuñ ki haqīqat ko badal duuñ

haq baat kahūñgā magar ai jur.at-e-iz.hār

jo baat na kahnī ho vahī baat na kah duuñ

har soch pe ḳhanjar sā guzar jaatā hai dil se

hairāñ huuñ ki sochūñ to kis andāz meñ sochūñ

āñkheñ to dikhātī haiñ faqat barf se paikar

jal jaatī haiñ poreñ jo kisī jism ko chhū luuñ

chehre haiñ ki marmar se tarāshī huī lauheñ

bāzār meñ yā shahr-e-ḳhamoshāñ meñ khaḌā huuñ

sannāTe uḌā dete haiñ āvāz ke purze

bāroñ ko agar dasht-e-musībat meñ pukārūñ

miltī nahīñ jab maut bhī māñge se to yārab

ho izn to maiñ apnī salīb aap uThā luuñ

phulon se lahu kaise Tapakta hua dekhun

aankhon ko bujha lun ki haqiqat ko badal dun

haq baat kahunga magar ai jurat-e-izhaar

jo baat na kahni ho wahi baat na kah dun

har soch pe KHanjar sa guzar jata hai dil se

hairan hun ki sochun to kis andaz mein sochun

aankhen to dikhati hain faqat barf se paikar

jal jati hain poren jo kisi jism ko chhu lun

chehre hain ki marmar se tarashi hui lauhen

bazar mein ya shahr-e-KHamoshan mein khaDa hun

sannaTe uDa dete hain aawaz ke purze

baron ko agar dasht-e-musibat mein pukarun

milti nahin jab maut bhi mange se to yarab

ho izn to main apni salib aap uTha lun